Bas Teen Shabd

                                 

Mere call bell bajane ke kuch der bad darwaja khula.sar par dupatta ,lalaat par halka gola sa chandan aur hathon me aarti ki thali liye woh khadi thi,mano abhi hi puja karke uthi ho.aarti ki thali me jalta kapoor apna dam tod chala tha.phir kya wo hame niharti rahi aur hum use.sahsa pichhe se awaz aayi,wakeel sahib hai kya................?

Tabhi hum dono ki tandra tuti.ye koi nahi .....mere papa ji the.vastav me main apne college ki chhuttiyan bitane Jharkhand ke ek chhote se sahar Simdega gaya tha,jahan mere papa ji Jharkhand police mein S.I. the.ek din subah papa ji hame ghumane ke liye bahar le gaye,raastein mein hi wakeel sahib ka makaan tha ,jo unke behad karibi the.wakeel sahib ki umar sambhawtah 30 saal ki rahi hogi..Wo Simdega zila court mein kaam karte the.

Tabhi andar se awaz aayi..”SADHNA...! Kaun hai darwaje pe?”tab maine jana uska naam Sadhna hai.

“Haan-Haan..... aap log andar to aaiye”,wakeel sahib ne kaha .

Kahiye,kaise hai aap?wakeel sahib ne puchha.

‘thik hoon’.papa ji ne kaha.

‘Sadhna inke liye chai-pani to lao’.wakeel sahib ne Sadhna se kaha.

Sadhna ki aor ishara karte hue wakeel sahib ne papa ji  se kaha—ye meri chhoti behan hai jo yahi se graduation kar rahi hai.Phir dono kafi der tak baithe baatein karte rahe aur main unlogo ke saath rahkar bhi kahin khoya tha.

‘chai lijiye na... nahi to thandi ho jayegi.’

Achanak mera dhayan tuta,Sadhna samne thi.papa ji aur wakeel sahib bat kare-karte bahar nikal aaye the.Tabhi Sadhna ne puchha........aapka naam kya hai?

Maine apna naam bataya.

Pata nahi Sadhna me aisa kya tha jo main uske pas rahkar achha mahsus karne laga tha aur ye  to bas pehli mulakat thi.Tabhi papa ji ne bahar se awaz lagayi ki ab chalne ka samay ho gaya hai,phir kya tha, maine Sadhna ki aankhon me dekha wo aisi lag rahi thi mano mere rukne ki guzaris kar rahi hai.Main sarpat uske ghar se nikal pada aur wo chupchap khadi mere kadmo ki chalk o niharti rahi.

Sadhna se mile char-panch din ho gaye the.ab har roz yahan tak ki har pal uski yaad satane lagi thi.Tabhi laga ishwar ne hamari sun li.papa ji ne kisi kagaz ke silsile me wakeel sahib ke ghar jane ko kaha.phir kya tha,maine naye kapde pehne aur aaine ko na chahkar bhi samay deta raha.

Main wakeel sahib ke ghar ke samne pahuncha,phir call bell bajaya.Kisi shasdi-shuda aurat ne darwaza khola,shayad ye wakeel sahib ki biwi thi.

‘wakeel sahib to Rourkela gaye hai.’unhone kahan.

Par meri nazrein to kisi aur ko talaash rahi thi.maine wapas apne kadam moda hi tha ki wo pichhe khadi thi,hath me bag latkaye pehli monsoon ki baris me bhigi wo shayad college se wapas aa rahi thi.galo par bikhre pani ki bundein aise lag rahe the mano  motio ki bahaar aayi ho.

“andar aaiye na , chai pi ke jaiyega.”Sadhna ne kaha.

‘darasal main papa ji ke kisi kaam se wakeel sahib se milne aaya tha.’maine kaha.

‘thik hai, main bhaiya ko bol dungi.’Sadhna ne kaha.

Aap zara baithiye ,main kapde badal kar aati hoon.    

 Sadhna hath me  chai ka pyala lekar samne aayi aur ek chai meri taraf badha diya.

”kambakht ye sawan ka mahina ,hamesha baris ki bundein paresan to kate hain par sath-sath lubhawan bhi hote hai,aisa lagta hai jaise man ko tript karte ho.”Sadhna ne kaha.

‘haan wo to thik hai.’ Maine kaha.

“Dharti ki pyas bujhane is nayak ko aana to parega,aakhirkar kab tak yah nayika sukhi bejan padi rahegi apne premi ke intezar me. Aur phir shayad armano aur khawahiso ke janm ka mausam bhi to yahi hai.” Maine kaha.

“‘ kya khub kahi’.par yah soch kar hi dar lagta hai ki yah nayak phir chala jayega aur phir pata nahi tripti milegi ya nahi.aajkal ke monsoono ka bhi to pata nahi kab suru hogi aur kab khatam.”

Usne kaha.

“phir bhi har sal is nayika ko apne nayak ka intezar to rahta hai,wo jayega kyonki use jana hai,aur prem to apne parwan pe tab hota hai, jab intezar ki ghariyan lambi hoti jati hai.” Maine kaha.

“haan wo to.........”bas itna kahkar wo chup ho gayi,aage kuch bhi nahi kah payi.

Bat karte-karte kafi waqt nikal gaya tha.ab to use alag hone ki soch se hi dar lagne laga tha.phir bhi maine apne man ki bat man mein  hi rakhi.

Maine wahan se jane ke liye unse izazat mangi,par wo ektak mujhe hi dekhti rahi.shayad use kuch kehna tha par kah na saki.

Main gumshum rahne laga tha. Sadhna ka haseen chehra meri aankhon ke samne ghumta rahta.Par kya Papaji swikar karenge, ye bat soch kar hi main bhanwar me ulajhta chala jata.

Ek aisa bhanwar jiski na to koi suruaat najar aati na ant. Sawaal mere papaji ka hi nhi tha, kya wakeel sahib swikar taiyar honge???   Ye baatein mere man ko kachotati rahti. Ek subah main balcony me baitha Newspaper padh raha tha, tabhi wakeel sahab ka aagman hua.

Kaise ho?? Unhone mujhse pucha.

Thik huin.

Maine unhe chair diya aur khud Papaji ko bulane andar chala gaya. Phir Papaji aur Wakeel sahab kafi der tak baithe baatein karte rahen.

‘Yahan ek bahut bada mela laga hua hai....kyun nahin hum sabhi ek sath mela ghumne chale.’ Wakeel sahib ne kaha.

Papaji ne unki bat me hami bhar di.

Sham ko humlog ghumne gaye. Wakeel sahab ki biwi aur Sadhna bhi unke sath thi. Bahut dino ke bad main Sadhna se mila tha. Main kafi khush tha. Mela ghumte-ghumte Main aur Sadhna kafi dur nikal gaye the. Usne mera hath pakar liya taki kahin humlog logon ki bheed me kahin alag na ho jaye. Uska mere itne karib aana man ko shakun pahuncha raha tha. Aisa laga mano usne jindgi bhar ka sath nibhane ke liye mera hath thama ho.

‘Aap mujhe behad pasand hai aur mai aapko chahne lagi huin.’

Sadhna ke muh se nikle in shabdo ne jaise mere man me halchal macha di thi.

‘Kayi dino se main aapse milna chahti thi...baatein karna chahti thi.’

Main bhi chup na rah saka..

‘Main to tumhe us din se pasand karta huin,jis din maine tumhe pehli bar dekha tha. Main jab bhi tumhari aankhon me dekhta huin ,apni khoobsurati jhalakti hai. Khud ko mahsus karta huin. Khud ko milta huin. Tum mere liye us darpan ki tarah ho jahan har koi apne aap ko mahsus karne ke liye us darpan se rubaru hota hai.’

Main bas bolta hi gaya. Aaj kuch bhi na chupa saka.

Bheed me ghumti har najar bad yahi sawaal kar rahi thi ki humlogo ka rishta kya hai?? Par Sadhna ki najarein sab bayan kar rahi thi.

Sadhna bhi chup na rah saki.

‘Aapki namaujudgi ne mujhe bahut sataya, na chahte hua bhi aapka chehra meri aankhon ke samne ghumta rahta tha. Jab-jab dharti ka Milan baris ki bundo se hota ,tab-tab meri antaratma se yahi aawaz aati...mera Nayak mujhe kab milega?? Aur ye dekhte-dekhte swatah meri najarein is talaash me kahin kho jati. Aur phir baris ki har bundon me mujhe bas aapka hi chehra najar aata. Shayad mujhe mera jawab mil chuka tha.’

Sadhna ki baatein sunkar main dar sa gaya tha.

 Tabhi usne mujhse puchha..

“aap wapas kab ja rahe hain.”?

Maine kaha....aaj hi, dopahar ki bus se.

“Main intejar karungi.”in teen shabdon mein shayad usne sab-kuch kah diya tha.uski aankhon se aansu chhalak aaye the.mere kadam to jaise uthne ke naam bhi nahi le rahe the,aur phir main halki kadmo se chalta hua uske muhhale se bahar aa gaya.