Nayee Raahein

                        

Suraj thaka-manda apne aashiyane ko laut chukka hai.Paschim me pasri hui wo madhur lalima dheere-dheere shes hoti ja rahi hai.Aasman me sleti rang ka surur chhata ja raha hai aur ikke –dukke shwet badlo ke tukre phija me tair rahe hai, aur jhopri se uthta dhuaan , purba hawa ke jhokon ke sath piche ki aor chhuta ja raha hai. Yahin kyon....sab kuch to pichhe hi chhuta ja raha tha . Train dhardhrati hui,patriyon ko raundte hue chali ja rahi thi.Aur Shekhar ... uske bhi to sare sapne bedardi se raunde ja chuke the. Wo to sab kuch pichhe chhor aaya tha,pichhe...kafi dur. 

          Khidki ke pas baitha shekher apni purani yaadon me khoya hua tha aur train puri rafter ke sath manjil ki aor badhi ja rahi thi. Station aate, bhonpu bajta,gaari rukti,chahal-pahal badh jati ,phir ek lambi sitti aur gaari badh jati agle station ki aor.chai-mungfali wale shor machete ,akhbar wala chillata,magar shekhar kahi dur kisi dusri duniya me maujud tha.

Sal bhar pehle ki hi to bat hai,jab wo inter pas karne ke bad hazaribag se wapas ghar aaya tha. Kitna khush tha shekhar,halanki use akele rahne ki aadat ho gayi thi,phir bhi ghar-pariwar,maa se milne ki hasrat. Bus ki khidki se wadiyo ko niharta kab wo ghar pahunch gaya pata hi nhi chala.

          Shekhar ki maa aur uske do chhote bhai-behan shahar me hi kiraye ke makaan me raha karte the. Pitaji to hazaribag me hi job karte the. Maa ne kafi dino ke bad dekha, aankhen baras pari.

Dheere-dheere shekhar wahan ke mahaul me dhalne laga. Us din sham ke 5 baj rahe honge. Garmi ke din the,shekhar chat par baitha aasman ki aor dekh raha tha. Wah apne tasawoor me khoya tha ki kisi ke payal ki chhanakti aawaz ne uski tandra ko bhang kiya. Shekhar ne najarein uthai,koi ladki chhat ke ek kone me lage tulsi ke paudhe ke pas diye jala rahi thi. Uski peeth shekhar ki aor the,khule kesh kandhe par lahra rahe the aur dupatta hawa ke jhokon ke sath lay mila raha tha. Shekhar bas use niharta rah gaya.

         Tabhi wo ghumi aur  dono ki najarein mili,phir sharm se jhunkti chali gayi. Sidhiyo par bajte uske payal ki chhan-chhan shekhar ke hriday me rat bhar bajte rahe. 

Agle din shekhar jab kamre me baitha koi pustak padh raha tha, uske kano me phir wahi chhanakti payal ki aawaz sunai di...usne socha shayad bharam hai: lekin tabhi ek madhur aawaz uske kano me padi—“chachi,aaj bunty ka janamdin hai. Didi ne kaha hai,aaj sham ko aaplogo ka khana hamare yahan hoga.”

Maa ne kaha-“achha, baith to thodi der, mujhe to fursat hi nhi milti. Shekhar ke liye chai bana rahi thi,tu bhi pi ke ja.” Lekin wo shayad jaldi me thi-“nahi chachi,abhi to bahut kam hai,bad me kabhi aaungi.”

Maa jab chai lekar aayi boli-“ beta, aaj sham ko shashi babu ke yaha nimantran hai. Tum bhi....” shekhar ne bich me hi toka ,” ye shashi babu kaun hai?”

Maa ne kahan-“sham me chalna sabse mil lena.ye log hamare sath isi makaan me rahte hai.”

Shekhar sham tak usi ki khayalo me khoya raha. Aangan ke dusri taraf kafi chahal-pahal thi. Shekhar ki maa bhi wahi gayi thi. Shekhar khidki ke bahar khelte bacho ko dekh raha tha.

“aap bhi chaliye na...cake katne wala hai.” Kisi ne shekhar ke kano me mithas bhar di. Wah palta,samne darwaje par wahi khadi thi. Shekhar kuch bol nhi paya,bas utha aur chal diya.

Maa kisi se kah rahi thi-“haan,yah kuch dino ke liye aaya hai,phir aage ki padhai karne dekhiye kahan jata hai.”phir shekhar ko dekhkar boli-“beta, pranam  karo ye shashi babu hai.” Shekhar ne aupcharikta  nibhayi. Kuch hi samay me shekhar us pariwar se parichit ho chuka tha.

“sandhya, yah mithai jara shekhar babu ko dena to....” shayad ye shashi babu ki patni thi. Mithai lekar jab wahi ladki samne aayi to shekhar ne jana yahi sandhya hai. Usne chupchap ek mithai utha liya aur ek taraf baith gaya.

“chachi, ye shekhar babu bolte nhi kya ?”akele baithe rahte hai.” Sandhya shekhar ki maa ke pas baithi puchh rahi thi.

“nhi, sarmata hai na!”. Maa ne kaha phir uski aor dekhkar dono hans pare.

Shekhar ko apni beyijatti mahsus hui , wo utha aur apne kamre me chala aaya.

“naraj kar diya na shekhar babu ko. Dekh to ja kar”. Sandhya ki didi ne use fatkara.

Shekhar aa kar bed par let gaya tha.

 “ aap naraj hai humse”. Shekhar ne aankhen kholi , dekha darwaje par sandhya sar jhukaye khadi thi.

“nhi to,aao baitho...”. shekhar ke muh se anayas ki nikal para.

“to fir waha  se kyun chale aaye??”

“bas aise hi,kuch achha nhi lag raha tha”.

“kyun,bor ho rahe the?”

“nhi...”

“khair chhoriye ,ab aap bore nhi honge ”.

“kyon...?”

“kyonki main jo huin. Achha pahle chaliye bhojan kar lijiye, sab intejar kar rahe honge.”

                                 Ab shekhar ka man ramne laga tha. Uska tarun man ek swapnil duniya basane laga . gumshum rahne wala shekhar jo bahut kam bolta tha, sandhya ke sath khub baatein karta . sandhya bhi shekhar ke bahut karib aa gayi thi. Roz dono naye-naye sapne bunte. Magar kudrat ko shayad yah pranay –pushp manjur nhi the.

Idhar shekhar aur sandhya ka prem parwan chadh raha tha aur dusri taraf sandhya ka vivah tay ho raha tha.

Sham me sandhya shekhar se milne aayi,subah use apne ghar jana tha. Dono kafi der tak baithe rahe. Dono ki aankhen baras rahi thi. Bebas shekhar ki juban se bol nhi fut rahe the,bas dono ka dil ek dusre ka gam baant rahe the.

     Sandhya ne shekhar ke aansu pochhe gala bhar aaya tha-“shekhar babu, pyar to kabhi purn ho hi nhi sakta , kyonki iska to pahla akshar hi adhura hai.”

Shekhar chup tha, bas aankhe bol rahi thi.

Wo utha, usne sandhya ki aankho me dekha, uske lalaat ko kanpte hontho se sparsh kiya  aur jhatke se bahar  nikal aaya .

Din gujre, sandhya ki shadi bhi ho gayi. Idhar shekhar ka dakhila Durgapur me engineering college me ho gaya. Kahte hai..waqt gahre jakhmo ko bhi bhar deta hai,shayad aisa ho raha tha.

“chai garam.....chai garam....”. shekhar ki nind khuli,subah ho chuki thi. Train me bhi chahal-pahal badh gayi thi. Sabhi fresh ho rahe the. Kuch chai ki chuskiyo ke sath akhbar padh rahe the.

        Shekhar apne gantavya ki aor pahunch chukka tha. ”yatrigan, kripya dhayan de, 3032 down Mithila Express jo apne nirdharit samay se char ghante vilamb hai,platform number char par aa rahi hai  ”. platform par bhonpu ki aawaz gunj rahi thi.

Shekhar college ke samne bus se utra. Samne hi likha tha—

“DURGAPUR INSTITUTE OF ADVANCED TECHNOLOGY AND MANAGEMENT”